எச்சரிக்கை

என்னுடைய நெருங்கிய தோழி ஒருத்தியின் தம்பி எனக்குமே அவன் தம்பி மாதிரிதான். அறிவான அழகான பையன். அவனுடன் பேசும் எல்லோருக்குமே பத்தாவது நிமிடத்தில் அவனை பிடித்துவிடும் அவ்வளவு நட்பான பையன். பிரியாக்கா என்று அவன் உரிமையாய் அழைத்து பேசும் போதெல்லாம் இவன் நிஜமாவே நம்ம கூட பிறந்து இருக்க கூடாதா என்று தோன்றும், அவன் இருக்குமிடத்தில் சிரிப்பு சத்தம் கேட்டு கொண்டே இருக்கும். ஆனால் சில மாதங்களாக அவனிடத்தில் மாற்றங்கள் காணப்பட்டது. எப்பொழுதும் கொஞ்சம் டல்லாகவே இருந்தான் படிப்பு சுமை ஜாஸ்தி என்று நினைத்தோம். மேலும் அவனுக்கு சற்று விருப்பமில்லாத பாடப்பிரிவில் சேர்த்து இருந்ததால் இப்படி இருக்கிறான் முதல் வருடம் முடியும் போது சரியாகி விடுவான் என்று நினைத்தோம். எப்பொழுது எங்கே பார்த்தாலும் இழுத்து வைத்து அரட்டை அடிப்பவன் ஒரு சின்ன புன்னகையுடன் ஒதுங்க ஆரம்பித்தான். பெரிய பையனாகி கொண்டு இருப்பதால் ஏற்பட்ட கூச்சம்தான் காரணம் என்று நினைத்தோம்.

இந்த கதையெல்லாம் இப்ப எதுக்கு சொல்லி கொண்டு இருக்கிறாய் என்று கேட்கிறீர்களா அவன் சென்ற இரண்டு வாரங்களுக்கு முன் தந்கொலைக்கு முயற்சி செய்து காப்பாற்ற பட்டுள்ளான். அவன் தற்கொலைக்கு முயற்சி செய்ததை விட அதிர்ச்சியான விஷயம் அதற்கான காரணம். அவனுக்கு போதை பொருள் உபயோகிக்கும் பழக்கமிருந்துள்ளது. அது வீட்டிற்கு தெரிய வந்ததால் இந்த முடிவை எடுத்துள்ளான். தற்போது தீவிர மருத்துவ கண்காணிப்பில் இருந்து வருகிறான். சின்ன சின்ன மாற்றங்களை கண்ட போதே அவனை அழைத்து பேசியிருக்கலாம் அவனுக்கு பிடிக்காத கோர்ஸில் வலியுருத்தி சேர்க்காமல் இருந்திருக்கலாம் என்றெல்லாம் இப்பொழுது எல்லோருமே புலம்பி வருகிறோம். அவனுடைய பெற்றோர்கள், உடன் பிறந்தவர்கள் அனைவருமே அவனுடன் நண்பர்கள் போலத்தான் பழகி வந்தனர். அதீத செல்லமா ஏன் எதற்கு என கேட்காமல் அவன் கேட்ட போதேல்லாம் பணம் கொடுத்ததா அவனுக்கு ஏன் இந்த பழக்கம் வந்தது என்பதற்கான காரணம் தெரியவில்லை.

எல்லாவற்றையும் விட முக்கியமான விஷயம். அவன் போதைக்கு உபயோகப்படுத்தியது கஞ்சா போன்ற வஸ்துக்கள் இல்லை. சாதாரணமாக நாம் வீட்டிலும் அலுவலகத்திலும் உபயோகிக்கும் ஓயிட்னர் எனப்படும் கரெக்க்ஷன் சொலியூஷன்தான், ஆனால் இது மதுவை விட கொடிய பாதிப்பை ஏற்படுத்தும் என அவனுக்கு சிகிச்சையளிக்கும் டாக்டர் கூறியுள்ளார். உங்களுக்கு தெரிந்தவர்கள் யாரேனும் தனிமையை திடீரென நாடினாலோ அல்லது ஓயிட்னர் அதிகமாக வாங்குவது போல தெரிந்தால் அவர்களை கண்காணியுங்கள். தவறுகள் எங்கே வேண்டுமென்றாலும் நிகழலாம் .